Fimar passiv: Co tematisar il tema cun ils vischins?
Vus savurais fim, schisha u e-cigarettas che vegnan en Vossa abitaziun. Igl è Voss vischin che fima suenter la lavur, exact cura che Voss uffants giogan avant da mangiar. Quai è malempernaivel e nuschaivel per la sanadad – ma co pledentan ins quai per che la situaziun sa midia? Vus chattais sin questa pagina tips per la communicaziun che sa basan sin propostas psicologicas. Ultra da quai vegnis Vus a leger co proceder sch’ils emprims discurs n’han betg il success giavischà.
Noss tip: Manai in diari
Avant che far ils pass descrits qua sut, As recumandain nus da nudar cura e quant savens che Vus faschais fim en Vossa abitaziun e da fixar quai en in diari. Uschia pudais Vus far visibel la dimensiun dal problem ed argumentar cun fatgs objectivs. Questas infurmaziuns èn utilas per mussar ch’i na sa tracta betg d’in cas singul, mabain d’in problem che sa repeta.
Avant il discurs
Igl è bain pussaivel che Voss vischin na percorscha insumma betg che ses fim arriva en Vossa abitaziun. In emprim discurs porscha la schanza da sa barattar e da chattar cuminaivlamain ina soluziun.
Vesai Voss partenari da discussiun sco partenari en la soluziun – betg sco adversari.
Tscherni in mument quiet senza hectica.
Il discurs
Tun bainvulent
Cumenzai cun ina frasa che transmetta in tun bainvulent, p.ex.: «Bun di, jau hai vulì tematisar in pitschen problem che jau hai. Forsa pudain nus chattar ensemen ina soluziun.»
Evitai inculpaziuns u reproschas
Schai betg: «Voss fim è insupportabel e sto smetter», mabain plitost:
«Sche jau savur fim en mia abitaziun, survegn jau difficultads da respirar / mes uffants han tuss.»
Discurri da Vossas experientschas, betg da quai che l’auter fa «fallà».
Descrivai co ch’il fim arriva en Vossa abitaziun
Descrivai co ch’il fim arriva en Vossa abitaziun e tschertgai ensemen soluziuns.
Per exempel: «Jau hai remartgà ch’il fim vegn savens tras mias fanestras e ch’el è in problem da sanadad per nus. Pudessan nus discurrer co che nus pudain far quai pli agreabel per tuts?»
Propona pussaivladads senza sfurzar si questas pussaivladads
Per exempel: adattar ils temps, midar lieu.
Restai avert per il dialog e tadlai attentamain Voss visavi.
Empruvai da s’accordar a mesiras concretas.
Sch’il problem na sa lascha betg schliar en moda cumadaivla, pudais Vus far ils suandants pass.
Scriver ina brev al vischin
Quest stgalim n’è betg stringent, po dentant dar dapli paisa a Voss giavisch. Sche Vus stuais far ulteriurs pass, documentescha ina brev che Vus avais empruvà l’emprim da schliar il problem directamain.
En noss sectur brevs da model chattais Vus propostas che Vus pudais adattar.
Utilisar la mediaziun da vischinanza
Avant che infurmar il locatur po ina mediaziun esser raschunaivla. Questa intermediaziun facultativa gida a reducir las tensiuns ed a chattar – ensemen cun ina terza persuna neutrala – soluziuns equilibradas.
Pertge mediaziun?
Ella promova il dialog, mantegna la relaziun da vischins e po impedir in’escalaziun.
Cura è ina mediaziun raschunaivla?
Suenter in emprim discurs, sch’il problem resta, ma ina basa per discurs è anc avant maun.
Nua chattar ?
Bleras vischnancas u uniuns porschan ina mediaziun gratuita u favuraivla. [Qua pon ins cumplettar colliaziuns a purschidas localas]
Sche nagut na sa mida, avisai Voss vischin che Vus annunziais la situaziun a Voss locatur.
Impurtant !
Bleras persunas pertutgadas din suenter, ch’ellas hajan stuì metter anc dapli paisa sin il dialog ed ina mediaziun per evitar ils proxims pass. Quels custan temp, energia e savens era daners.
Nus recumandain urgentamain d’empruvar avant ulteriurs pass ina mediaziun.
Scriver ina brev al locatur
Sche l’emprova da sclerir il problem directamain cun il vischin fa naufragi, pudais Vus infurmar il locatur cun ina brev.
Agiuntai il meglier Voss diari cun la data, l’ura e l’intensitad da la mulesta – uschia documentais Vus cleramain quant ferm che Vus essas pertutgà.
Vus chattais sin nossa pagina in model per ina brev al locatur che Vus pudais adattar a Vossa situaziun.
Sustegn tras l’associaziun da las locatarias e dals locataris u tras la protecziun giuridica
Sche nagut sa mida, avais Vus duas pussaivladads.
Contactar l’associaziun da locatarias e locataris
Questas associaziuns s’engaschan per ils dretgs da las locatarias e dals locataris ed han savens dapli paisa ch’ina persuna singula envers in’administraziun u in locatur. La commembranza custa per regla ina contribuziun annuala, porscha dentant cussegliaziun giuridica, accumpagnament persunal e savens er agid tar proceduras.
[qua pon ins colliar las adressas da las associaziuns en Svizra]
Contactar la protecziun giuridica
En cas che Vus avais in’assicuranza da protecziun giuridica, As po quella cussegliar e sustegnair en cas d’ulteriurs pass.
Ulteriurs posts d’agid pussaivels
- In’advocatura spezialisada sin il dretg da locaziun.
- Posts communals u chantunals: Intginas vischnancas porschan ina cussegliaziun giuridica gratuita per locataris e per locatarias. As infurmai al lieu.