Davart la plattafurma
Ina plattafurma per ina meglra convivenza
Il fimar passiv u la vapur passiva en abitaziuns ed en locals utilisads cuminaivlamain è ina realitad per blers umans en Svizra. Sch’el deriva da vischinas e da vischins, da secturs communabels u dals spazis publics vischins –po el entrar en abitaziuns e chaschunar tensiuns, malesser e dubis per la sanadad.
En talas situaziuns èsi savens difficil da savair co ch’ins duai reagir: A tgi pon ins sa drizzar? Tge pass èn pussaivels? Tge dretgs han ins? E co discurran ins davart il tema senza chaschunar conflicts?
Questa plattafurma è vegnida sviluppada per respunder questas dumondas a moda clera, pratica ed accessibla a tuts.
Tge che la plattafurma porscha
La plattafurma metta a disposiziun:
- infurmaziuns segiras davart las consequenzas dal fimar passiv e da la vapur passiva
- decleraziuns davart ils mecanissems d’invasiun (fanestra, ventilaziun, structuras d’edifizis e.u.v.)
- indicaziuns concretas co prender per mauns a moda constructiva la situaziun
- mussaments per messadis e brevs (vischinadis, administraziun e.u.v.)
- rapports davart experientschas dal mintgadi
La finamira è quella da gidar tut ils umans a chattar soluziuns adattadas per lur situaziun – en il senn d’in dialog plain respect e d’ina buna convivenza.
Tgi che stat davos il project
Questa plattafurma è vegnida sviluppada da la cuminanza da lavur per la prevenziun da tubac svizra (AT Schweiz).
AT Schweiz s’engascha sin plaun naziunal per la prevenziun dal tubachissem. Cun quest project metta l’organisaziun a disposiziun infurmaziuns independentas e meds d’agid concrets per s’occupar d’in problem ch’è anc pauc vesaivel en il mintgadi.
Partenaris e contribuziuns
Il project è vegnì realisà cun il sustegn e cun l’expertisa professiunala da la Lia pulmunara svizra ch’è sa participada sco partenaria scientifica.
Team da project (AT Svizra)
- Direcziun e concept: Luciano Ruggia
- Direcziun dal project: Benoît Perriard
- Concepziun e svilup da l’internet: Vincent Baujard
- Redacziun dals cuntegns: Linn Andersen, Angeliki Balantani, Benoît Perriard
- Communicaziun: Benoît Perriard
Translaziuns
La pagina d’internet po vegnir consultada en tut las quatter linguas naziunalas:
- tudestg: Linn Andersen, Angeliki Balantani, Stefanie Pfeffer, Christian Winiker
- talian: Jocelyne Giannini, Agata Vetterli
- franzos: Benoît Perriard
- rumantsch: Claudia Cathomas, Florentin Lutz
Illustraziuns
- Ambroise Héritier
In punct da partenza che sa basa sin respect e soluziuns concretas
Questa plattafurma ha in concept che na valitescha betg. Ella n’ha betg la finamira d’opponer ils umans in cunter l’auter, mabain da promover ina meglra convivenza.
Ils cuntegns sa basan sin trais princips fundamentals:
- metter a disposiziun infurmaziuns cleras e fidadas
- porscher soluziuns concretas e realisablas
- promover il dialog ed il respect vicendaivel
Cunquai che mintga situaziun è differenta, na sa tracti betg da dar ina suletta soluziun, mabain da porscher in’orientaziun utila.