Animals da chasa sco cunfimaders involuntars
Il fimar passiv n’è betg mo nuschaivel per la sanadad dals umans. Er animals da chasa sco chauns, giats u animals pitschens pon patir dal fim da tubac. Cunquai ch’els vivan cun nus en locals serrads respiran els la medema aria – ed uschia er las substanzas nuschaivlas dal fim da cigarettas.
Tge fastizs lascha il fim passiv tar noss animals da chasa?
Animals da chasa, exactamain sco ils umans, absorbeschan substanzas nuschaivlas sco nicotin e substanzas che chaschunan cancer tar il fimar passiv. En differents studis han ins pudì cumprovar ch’il cotin, in product ch’explotescha nicotin, sa ferma en l’urin, en il sang ed en il pail dals animals. Quai mussa quant fitg ch’ils animals èn exponids al fim.
Da mancanza da flad fin a cancer – las ristgas en survista
Questa contaminaziun po chaschunar midadas en il corp ed augmenta la ristga da malsognas da la via respiratorica, inflammaziuns e schizunt cancer d’animals. Differents studis cumprovan il connex tranter il fimar passiv ed ils donns da sanadad tar ils animals. Latiers tutgan tranter auter inflammaziuns u midadas da cellas dals organs respiratorics, ina ristga pli gronda per tschertas spezias da cancer sco er l’indebliment dal sistem d’immunitad; animals daventan uschia pli sensibels per infecziuns e per tumors. Plinavant pon ins constatar midadas dal cumportament tar ils animals. Chauns ch’èn exponids al fim passiv pateschan da dapli tema, d’ina agressiun e d’ina abilitad pli pitschna d’emprender.
Uschia protegis Voss animal dal fim da tubac
Animals da chasa èn dependents da nossa protecziun. Tgi che fima, duess esser conscient ch’er animals pon patir da las consequenzas. In dachasa senza fim è in pass impurtant per ina convivenza sauna – per ils umans e per ils animals. Na fimai perquai betg en locals serrads en ils quals animals sa trategnan. Er dar aria bain na basta betg – particlas da fim sa tschentan sin mobiglias, tarpets ed en il pail.
Funtaunas:
- Bertone, E. R., Snyder, L. A., & Moore, A. S. (2002). Environmental tobacco smoke and risk of malignant lymphoma in pet cats. American Journal of Epidemiology, 156(3), 268-273.https://doi.org/10.1093/aje/kwf044
- Bertone-Johnson, E. R., Procter-Gray, E., Gollenberg, A. L., Bundga, M. E., & Barber, L. G. (2007). Environmental tobacco smoke and canine urinary cotinine level. Environmental Research, 106(3), 361–364. https://doi.org/10.1016/j.envres.2007.09.007
- Johnson, J. D., Houchens, D. P., Kluwe, W. M., Craig, D. K., & Fisher, G. L. (1990). Effects of mainstream and environmental tobacco smoke on the immune system in animals and humans: A review. Critical Reviews in Toxicology, 20(5), 369–395. https://doi.org/10.3109/10408449009089870
- Vasconcelos, T. B. de, Araújo, F. Y. R. de, Pinho, J. P. M. de, Soares, P. M. G., & Bastos, V. P. D. (2016). Effects of passive inhalation of cigarette smoke on structural and functional parameters in the respiratory system of guinea pigs. Jornal Brasileiro de Pneumologia, 42(5), 333–340. https://doi.org/10.1590/S1806-37562015000000342
- Groppetti, D., Pizzi, G., Pecile, A., Bronzo, V., & Mazzola, S. M. (2023). Cotinine as a sentinel of canine exposure to tobacco smoke. Animals, 13(4), 693. https://doi.org/10.3390/ani13040693
- Reif, J. S., Dunn, K., Ogilvie, G. K., & Harris, C. K. (1992). Passive smoking and canine lung cancer risk. American Journal of Epidemiology, 135(3), 234–239. https://doi.org/10.1093/oxfordjournals.aje.a116276
- Alaie, M., Sheikhi Narani, M., Jamshidi, S., Tamimi, N. S. M., & Akbarein, H. (2025). Behavioral changes in domestic dogs associated with exposure to secondhand smoke: A cross-sectional study. Journal of Veterinary Behavior, 79, 53–59. https://doi.org/10.1016/j.jveb.2025.04.008
